Agurra

Ongietorri Berriobeitiko Udalera, Iruñerriko Zendea berria baita, eta hamar herriz osatua dago, guztiak ere Ezkaba-mendiren eta Eltxumendiren berokian. Herri bakoitzak bere nortasuna du, bere izaera. Honatx: Aitzoain, Añezkar, Artika, Ballariain, Berriobeiti, Berriogoiti, Elkarte, Larrageta, Lotza eta Oteitza.

Berriobeiti Zendea ederki sustraiturik dago bere lurraldean Erdi Arotik hona, bai gizarteari begira bai kulturari begira, baina ez da azken hamarkada hauetako aurrerapenetik eta demografia-hazkundetik kanpo gelditu, eta gaur egun, jende gehien bizi den Nafarroako hogei udalerrietako bat da. Bilakaera hori Artikan gertatu da funtsean, baina zorionez bateragarria izan da gure Zendean iparraldeen dauden herrietan landa-ingurunea kontserbatu izanarekin, horietakoren batek hogei biztanle besterik ez baitu.

Gauzak horrela, talde jarduerak bultzatzea eta herritarrak batzeko tresnak erabiltzea funtsezkoa da hain ezberdinak diren eta hain urrun dauden herrien arteko bizikidetza sustatzeko; hortik heldu zaio, beraz, garrantzia zu sartu zaren webgune honi. Eskuartean darabilzun tresna honek, hain zuzen ere, udala hurbildu nahi du herritarrengana, elkarren arteko komunikazio bideak ezarriz, jende orok izan dezan udalaren bizitzan parte hartzeko aukera. Horrela kudeaketa gardena eta parte-hartzailea sustatu nahi dugu, Berriobeitiko herritarrekin partekatua. Horixe da gure nahia gauza guztien gainetik, eta horretan ahalegintzen ari gara buru-belarri.

Espero dugu, gainera, webgune hau lagungarria izatea gure jendeak eta kanpokoek Berriobeiti Zendea hobeki ezagut dezaten; hemengo herriak, jaiak eta ohiturak, jarduera ekonomikoa, bertako naturguneak, kultur adierazpenak… Harro egoteko gauzak baitira Berriobeitiko auzokideentzat, eta guztiz erakargarriak, gure bazterrak ezagutzen ez dituzten kanpotarrak Zendean barna ibil daitezen.