Joan den abenduaren 9an, Berriobeitiko Udalak 2026ko ekitaldirako 7.282.225 euroko aurrekontua onartu zuen, EH Bildu, Plazaola, VPA eta PSNren aldeko 7 botorekin eta UPN, PP eta AABren aurkako 6rekin. Aurrekontu honen helburua Berriobeitiko udalerriak bizi duen biztanleria-hazkundeari erantzutea da, espazio, ekipamendu eta herritarrentzako zerbitzu berriak sortuz eta hobetuz.

Datorren urterako inbertsioak 839.000 eurokoak izango dira. Artika Berrian dagoen liburutegi publiko berria bezalako obra publikoak bultzatuko dira, eta dagoeneko hasita daudenak amaituko dira, hala nola Berriobeitiko kontsultategiko obrak. Era berean, udal plantilla indartuko da, administrarien plaza berriekin eta polizia agente gehiagorekin (2 pertsonatik 6 izatera pasako dira).

Kirol arloan, Artika Berrian egongo den kiroldegiaren proiektua eguneratzea aurreikusten da (40.000 euro), eta inbertsio handia egingo da Berriobeitiko (26.000 euro) eta Artikako (50.000 euro) igerilekuetan. Kultura arloan, Artika Berriko liburutegi berriaz gain, 30.000 euro esleituko dira Berriogoitiko Jauregia garatzeko. Mugikortasun jasangarria bultzatzeko, bizikleta elektrikoen zerbitzu bat jarriko da abian (41.500 euro), joan-etorri jasangarriagoak sustatzeko, emisioak murrizteko eta egunerokoan ohitura osasungarriak sustatzeko helburuarekin. Gainera, Oteizako bidegurutzean biribilgune bat eraikiko da (120.000 euro) inguruko trafikoaren segurtasuna eta arintasuna hobetzeko; hainbat kale hobetuko dira, besteak beste Andrelopa kalea; eta Mogoteseko eskailerak eraberrituko dira (30.000 euro). Horiek guztiak udal-egitura indartzeko eta Udalaren ekintza-ahalmena handitzeko inbertsioak dira.