Nafarroako Elikagaien Bankua Fundazioak Artikaberriko lokal batean dagoen Berriobeitiko banaketa unitatea bisitatu zuen martxoaren 19an, instalazioak ezagutzeko eta zerbitzua aurrera eramaten duten boluntarioen lana babesteko eta aitortzeko. Berriobeitiko unitatea Gizarte Zerbitzuen Mankomunitateak bideratutako familia onuradunei eta Berriobeiti, Berriozar, Itza eta Txulapaingo udalerrietan bizi direnei zuzenduta dago.

Nafarroako Osasun Publikoaren eta Lan Osasunaren Institutuak egindako ikuskapenaren ondorioz egin da bisita, banaketa-prozesuko irregulartasunak eta erabiltzaileen osasunerako arriskuak salatu ondoren. Ikuskaritza Zerbitzuak aldeko txostena egin zuen, elikagaiak manipulatzeari buruzko gomendio batzuekin. Berriobeitiko Banaketa Unitateak akatsak zuzentzeko neurriak hartu ditu dagoeneko, eta elikagaiak ez manipulatzeko konpromisoa hartu du.

Albisteak izan duen oihartzuna eta gainerako banaketa-erakundeei eragin diezaiekeen kaltea dela eta, Elikagaien Bankua Fundazioak argitu du bere zeregina ez dela pertsona onuradunei herrietan zuzenean banatzea, nahiz eta banaketa-unitate batzuek “Elikagaien Bankua” izendapena erabili eta nahasmena sortu. Era berean, Nafarroa osoko hainbat gizarte erakunderi ematen dien elikagaien trazabilitatearen kontrolean kudeaketa defendatu du, eta Berriobeitik egindako lana baloratu du, baita egindako akatsak zuzentzeko banaketa unitatearen prestutasuna ere, horiek ez baitutela inoiz osasun fisikoko arazorik sortu.

Hain zuzen ere, Berriobeitiko Banaketa Unitateko boluntarioen lana nabarmentzeko, Marisol Villar Nafarroako Elikagaien Bankua Fundazioko presidentea, Nati Vitórica Fundazioko presidenteorde eta elikagaien segurtasun arloko arduraduna eta Alba Equiza Nafarroako Elikagaien Bankua Fundazioko gizarte-langilea Berriobeitiko instalazioetara joan ziren, beren laguntza eta funtzionamendu ona erakusteko. Gainera, bisita aprobetxatu zuten, besteak beste, Nafarroako Osasun Publikoaren eta Lan Osasunaren Institutuan jorratutako gaien eta neurrien berri emateko, hemendik aurrera banaketa-erakunde guztiei eragingo baitiete; lan-ildoak zehazteko; hitzaldiak planifikatzeko; eta boluntarioentzako informazio- eta prestakuntza-ikastaroak antolatzeko.